Оңтүстік Корея президенті өлім жазасына кесілуі мүмкін

Оңтүстік Корея прокуратурасы қамауға алынған президент Юн Сок Ёлге «бүлікті басқарды» деген айып тақты, деп хабарлайды Orda.kz.

Yonhap басылымының жазуынша, Юн елдің бұрынғы қорғаныс министрі және басқа да лауазымды тұлғалармен бірігіп, 2024 жылдың 3 желтоқсанында құқыққа қайшы заңсыз әскери жағдай енгізуге тырысқаны үшін сотқа тартылды. Олар бұл ойын қандай да бір соғыс, қарулы қақтығыс немесе ұлттық дағдарыс белгілері болмағанына қарамастан іске асырғаны айтылған.

Бұдан басқа Юн Сок Ёль парламентте әскери жағдайды жоюға қарсы дауыс беру процесін бұзу үшін әскер жіберді, оппозиция жетекшілерін және сайлау комиссиясы өкілдерін тұтқындауға әрекеттенді деп айыпталып отыр. 

Шеттетілген президенттің адвокаттары айыптауларды заңсыз деп отыр және оларға қарсы шағымданбақшы. Президент сотқа дейін қамауға алынды. Оңтүстік Кореяда бүлікке қатысқандар өмір бойы бас бостандығынан айыру немесе өлім жазасына кесіледі, бірақ соңғы онжылдықтарда өлім жазасы орындалған жоқ.

Ол Оңтүстік Кореяның қамауға алынған алғашқы президенті. Желтоқсан айының басында Юн елде әскери жағдай енгізуге тырысты, содан кейін парламент оны бүлік шығарды деп айыптап, импичмент жариялады.