Нұрсұлтан Назарбаевтың қайын атасы: ҚазҰАЗУ мүлкі жекеменшікке өтті

Алматыда орналасқан Қазақ ұлттық аграрлық зерттеу университетінің өкілдері бүгін оқу орны маңына жиналды. Олардың айтуынша, университетке тиесілі мүліктер – атап айтқанда, үш жатақхана, бес ірі зертхана мен алты гектар жер заңсыз түрде жекеменшікке берілген.

Orda.kz университет маңында өткен жиынға барып, аталған дауға қатысты мән-жайды анықтады.

«Бұл аумақ бұрын толығымен университетке тиесілі болған. Бір жағы – Фурманов, екінші жағы – Абай, Уәлиханов және Сәтбаев көшелерімен шектеседі. Қазір осы жерде «RAMS» ЖШС тұрғын үй кешенінің құрылысы жүріп жатыр. Егер жатақхана салынып жатса, түсінер едік. Бірақ мұнда пәтер салып жатыр», – деді университет оқытушысы Сәлима. 

«Аталмыш жер учаскесі «RAMS QAZAQSTAN» ЖШС меншігінде емес екенін мәлімдейміз. Бастапқы кезеңде компания шынымен де жобаға бас мердігер ретінде ғана қатысты. Алайда 2022 жылы жер учаскесінің меншік иесімен және жобаның тапсырыс берушісімен шарттық қатынастардың тоқтатылуына байланысты компанияның осы аумақта құрылысты іске асыруға одан әрі қатысуы толығымен тоқтатылды», – деп жауап берді «RAMS QAZAQSTAN».

Мәжіліс депутаты Ерлан Саировтың айтуынша, даулы аумақтағы құрылысты тоқтатудың жалғыз жолы – Құрылыс комитетінің тексеруі нәтижесінде оның заңға сәйкес келмейтінін дәлелдеу.

«Комитет келіп тексергенше бұл жерді дереу жабуымыз керек. Бізге негізгі құқық белгілейтін құжаттар қайтарылуы тиіс. Құжаттар қайтарылмайынша, университет бұл аумаққа иелік ете алмайды», – деді Алматы қалалық құрылыс бақылау басқармасының басшысы Данияр Қырықбаев.

Ал Алматы қаласы әкімінің орынбасары Бейбіт Шаханов бұл жердің заңсыз берілгені жөнінде әзірге ешқандай ресми қорытынды жасалмағанын атап өтті.

«Сот шешімі шыққан соң ғана іс жалғасады. Университет әкімдікке ресми өтініш беруі қажет», – деді ол. 

Университет әкімшілігінің мәліметінше, бұл аумақ 2006 жылы жекеменшікке өткен. Аграрлық университеттің активтері – оқу және әкімшілік корпустары мен жер телімдері 2000 жылдардан бастап кезең-кезеңімен беріліп кеткен.

«Қазір бұл іспен жемқорлыққа қарсы агенттік айналысып жатыр. Біз араласа алмаймыз. Бұрынғы билік кезінде кеткен заңсыздықтардың салдары бүгінгі студенттердің қауіпсіздігіне кері әсер етіп отыр. Бұл – Алматы қаласының ортасындағы техногендік апат қаупі бар жағдай. Қазір мен Бас прокурорға ресми мәлімдеме жасап отырмын. Егер Мемлекет басшысы Қасым-Жомарт Тоқаевтың заң мен тәртіп орнату концепциясы жүзеге асуы тиіс болса, ең алдымен осындай бассыздықты тоқтату қажет. Сонымен қатар, Премьер-министр мен Өнеркәсіп және құрылыс комитеті тарапынан да нақты шешім қабылданбай отыр», – деді депутат Ерлан Саиров. 

Депутаттың пікірінше, бұл жағдай президенттің заң мен тәртіп қағидаттарына қайшы әрекет. Себебі бұл мәселенің шешілуіне нақты қадам жасалмаған.

Саировтың айтуынша, университетке тиесілі үш жатақхана мен бес зертхана корпусының тек біреуі ғана университет балансына қайтарылған. Қалғанына қатысты шешім Сыбайлас жемқорлыққа қарсы агенттіктің қылмыстық ісі аясында қабылданады.

«2006 жылы 9 не 12 нысан жекешелендірілген. Ол кезде кім не ұстаса, соның иелігіне өтіп кеткен кезең еді»,  – дейді университеттің құқық кафедрасының профессоры Егемберді Дайырбекұлы.

Университеттің белсенді студенттерінің бірі Нұрислам Нұрболұлының айтуынша, 9-жатақхананың бір бөлігі гүл сататын компанияға берілген.

«Мен осы жатақханада тұрамын. Ол компания кімге тиесілі екенін де білмейміз. Клиенттер жатақхана маңына көліктерін қойып, келіп-кетіп жатады. Бұл жағдай бізге қатты қолайсыздық туғызып отыр», – дейді студент.

Сонымен қатар, Бауыржан Байбек Алматы қаласының әкімі болып тұрған кезеңде тұрғын үй кешені құрылысына рұқсат кім бергенін анықтауға мүмкіндік туған. Қолда бар деректерге сәйкес, құрылысқа байланысты келіссөздерді сол кезде университет ректоры болған Тілектес Есполов жүргізген.

Ол 2001 жылдан бастап ұзақ жыл ректор қызметін атқарған. Айта кетейік, Есполов – Қазақстандағы ең ұзақ қызмет еткен ректорлардың бірі. БАҚ-тағы деректерге сай, ол Қазақстанның бұрынғы президенті Нұрсұлтан Назарбаевтың бейресми некедегі жары Әсел Құрманбаеваның (Исабаева) әкесі саналады. Сонымен бірге, Есполов басшылық еткен ҚР ҰҒА Аграрлық ғылымдар бөлімінің академиктер тізімінде оның ұлы Айдос та бар.

Қазіргі таңда университет меншігі болған корпустар мен жатақханалар өз иесіне қайтарыла ма, жоқ па – бұл әзірге белгісіз. Ал депутат Ерлан Саиров бұл мәселенің шешілуі Алматы қаласы әкімдігінің ұстанымына байланысты екенін айтып, оң шешім шығатынына сенім білдірді.

Orda.kz оқиға легін бақылауды жалғастырады.