«Назарбаевтың адам жегішіне» үкім шықты

Астананың қылмыстық істер жөніндегі мамандандырылған ауданаралық соты Қоспаевтың қылмыстық тобына үкім шығарды, деп хабарлайды Orda.kz.

Елдос Қоспаевқа 15 жыл, Айдос Қоспаевқа 12 жыл бас бостандығынан айыру жазасы тағайындалды.

Сондай-ақ, қалған айыпталушыларға: Руслан Шалин, Ерлан Имашев, Дастан Әбжанов,  Камардин Алымов, Рауан Бабаев, Алексей Кузнецов, Тимур Танашев әрқайсысы 12 жыл кесілді. Оксана Кудряшова есепші болып жұмыс істеуге тыйым салынып, 10 жылға сотталса, Василий Бабушкинге 9 жыл берілді.  Олардың мүлкі тәркіленіп, алкоголь өнімдерін сату қызметімен айналысуға тыйым салынды.

Айта кетейік, 2023 жылдың қыркүйегінде арнайы қызметтер Елдос Қоспаевты Солтүстік Кипрден Қазақстанға экстрадициялады. Қоспаев ұйымдастқан қылмыстық топ мүшелері кәсіпкерлердің мүлкін тартып алу кезінде зорлық-зомбылық пен қауіп-қатер тудырғаны, олардың компаниялардағы үлесін ұрлағаны, сондай-ақ көлеңкелі бизнеске қатысқаны үшін айыпталды.