Наурыз көже индексі: 2025 жылғы баға қаншаға өсті?

Наурыз мерекесі жақындаған сайын қазақстандықтарды бір сұрақ мазалайды: «Биыл Наурыз көже дайындау қанша болады?» 2025 жылы бұл дәстүрлі тағамды әзірлеу қаншалықты қымбатқа түседі? Orda.kz тілшілері осы сұрақтың жауабын іздеп көрді.

Ұлттық статистика бюросы биылғы Наурыз көженің орташа бағасын есептеп шықты. Бірақ біздің тілшілер Алматыдағы супермаркеттер мен базарлардағы нақты бағаларды салыстырып, есептердегі сандар мен нарықтағы жағдайдың қаншалықты сәйкес келетінін тексеріп көрді.

Ұлттық статистика бюросы не дейді?

Ресми мәліметтерге сүйенсек, Қазақстан бойынша Наурыз көже дайындауға қажет өнімдердің орташа бағасы:

• Айран  (1 литр, 2,5%) – 446 теңге
• Сүт (1 литр, 2,5%) – 413 теңге
• Арпа жармасы (1 келі) – 399 теңге (Көкшетауда ең арзан – 283 теңге)
• Күріш (1 келі) – 639 теңге (Шымкентте ең төмен баға – 535 теңге)
• Жылқы еті (1 келі) – 3098 теңге
• Тұз (1 келі)  – 76 теңге.

Ұлттық статистика бюросының есебінше, 2025 жылы орта есеппен Наурыз көже жасауға 5071 теңге қажет. Бірақ бұл тек орташа көрсеткіш.

Алматыдағы шынайы баға қандай?

Біз Алматыдағы супермаркеттер мен базарлардағы бағаларды тексердік. Көпшілік өнімдердің құны ресми деректерден әлдеқайда жоғары болып шықты.

• Айран – 531 теңге
• Сүт – 603 теңге
• Арпа жармасы (1 келі)  – 316 теңге
• Күріш (1 келі) – 835 теңге
• Жылқы еті (1 келі) – 5000 теңге
• Тұз (1 келі)  – 133 теңге.

Алматы тұрғындары Наурыз көжеге 7418 теңге жұмсайды. Бұл Ұлттық статистика бюросы есептеген қаражаттан 2 мың теңгеге көп.

Аймақтарда көже құрамы өзгеше болуы мүмкін

Наурыз көже – әр аймақта әртүрлі дайындалатын тағам. Бір жерде жарма, екінші жерде құрт, тағы бір жерде кептірілген өрік пен кеспе қосылуы мүмкін. Бұл қоспалар бағасына да әсер етеді.