Мьянмадағы жер сілкінісінен қаза тапқандар саны 1600-ден асты

Мьянма билігі 28 наурызда болған апатты жер сілкінісінен қаза тапқандардың саны туралы мәліметтерді жаңартты, деп хабарлайды Orda.kz сайты «Синьхуаға» сілтеме жасап.

Осы уақытқа дейін қаза тапқандар саны 1644 адамға жетіп, 3408 адам жарақат алды, тағы 139 адам хабар-ошарсыз жоғалды.

Бұған дейін Бангкокта қаза тапқандар туралы мәліметтер жарияланған болатын. Ол жерде қаза тапқандар саны 10-ға жетті, 16 адам жараланды, 101 адам хабарсыз кетті.

Естеріңізге сала кетейік, Мьянмада 28 наурызда жергілікті уақыт бойынша 12: 50-де (Астана уақыты бойынша 11:20) 7,7 магнитудалық жер сілкінісі болып, көптеген қираулар болды.

Эпицентр көлемі жағынан 1,5 миллион адам тұратын елдің екінші қаласы Мандалайдан шамамен 17 шақырым жерде орналасқан.

Мьянма билігі «кез келген елден, кез келген ұйымнан» гуманитарлық көмек  көмек сұрап, «шетелдік көмек үшін барлық жолдарды ашқанын» мәлімдеді.

Жер асты дүмпулері Таиланд, Бангладеш, Лаос, Қытай және Үндістанда сезілді.

Жер сiлкiнiсi едәуiр қирауға әкелді, көптеген ғимараттар бүлiнген не қираған. Бангкокта салынып жатқан 30 қабатты ғимарат құлап, оншақты адам қиранды астында қалды. Бұл Азия өңіріндегі соңғы жылдардағы ең күшті жер сілкіністерінің бірі.

29 наурызда Мемлекет басшысы Мьянма премьер-министрі Мин Аун Хлайнға көңіл айту жеделхатын жолдады. Қасым-Жомарт Тоқаев Мьянмадағы қатты жер сілкінісі салдарынан көптеген адамның қаза болғаны туралы хабарды зор өкінішпен қабылдады.

Сенбі, 29 наурыз күні Мьянмада 5,1 магнитудалы тағы бір жер сілкінісі болды. Сондай-ақ, елдегі электр құрылғылары зақымданғаны белгілі болды.

Қасым-Жомарт Тоқаев Мьянмадағы зобалды жер сілкінісі салдарынан көптеген адамның қаза болғаны туралы хабарды зор өкінішпен қабылдады. Ол премьер-министр Мин Аун Хлайнға және қаза болғандардың отбасыларына көңіл айтты,  сондай-ақ барлық зардап шеккендердің тезірек сауығып кетуіне тілектестік білдірді.