Метро құрылысынан ақша жымқырған 10 адамға үкім шығарылды

Алматы қаласының Алмалы аудандық соты оңтүстік астанадағы метро құрылысынан 5 миллиард теңгеден астам бюджет қаражатын жымқырды деп айыптаған 10 адамға қатысты үкім шығарды.

 Бұл туралы Бас прокуратура хабарлады.

 Сот отырысында «Метрополитен» КМК, «Алматыметроқұрылыс» АҚ, «Автоматтандыру және технологиялар қызметі» ЖШС басшыларының 2018 жылдың маусымынан 2020 жылдың тамызына дейін «Сарыарқа» және «Достық» стансаларын салу барысында қаржылық алаяқтықпен айналысқаны анықталды.

Соның ішінде жабдықтың құнын 10 есе арттырып, ірі көлемдегі ақшаларды жалған фирмалар арқылы шығарғаны дәлелденді. Сотталғандар мемлекеттік және қаржы ұйымдарында жұмыс істеу құқығынан және әртүрлі мерзімге бас бостандығынан айырылды. Ал негізгі фигуранттар 7 жылдан 8 жылға дейін бас бостандығынан айырылды. Сонымен қатар, сот 1 млрд теңгеден астам тыйым салынған мүлікті тәркіледі.

Сот үкімі заңды күшіне енген жоқ.