Президент Астана қаласының әкімі Жеңіс Қасымбекті қабылдады

Жеңіс Қасымбек Астананың биылғы бірінші жартыжылдықтағы әлеуметтік-экономикалық және инфрақұрылымдық дамуы жөнінде айтып берді.

Бұл туралы Ақорда хабарлады.

Жалпы биыл қалаға инвестиция көлемі 632 миллиард теңгеден асқан. Бұл өткен жылдың осы кезеңімен салыстырғанда 13,2 пайызға артық.

Атқарылған жұмыстарды атап айтар болсақ, осы жылы 20-дан астам мектеп пен 4500 орындық 6 студенттік жатақхана салынады. Сондай-ақ, елордада 170 аула мен қоғамдық орын, атап айтқанда саябақтар, гүлзарлар абаттандырылып, 70-ке жуық көше жөнделеді. Ұзаққа созылған тұрғын үй кешендері бойынша атқарылып жатқан жұмыстардың қазіргі үрдісі де айтылды.16 мыңнан астам үлескер-отбасының 15,5 мыңы баспаналы болған. Қалған үлескерлер пәтерлеріне осы жылдың соңына дейін қоныстанады.

Сонымен қатар, биыл «Тельман» газ жылу станциясының бірінші кезегін, «Тұран» газ жылу станциясының екінші кезегін және 3-ші ЖЭО-ның көмірмен жұмыс істейтін бөлігін іске қосу жоспарланып отыр.

Қасым-Жомарт Тоқаев Жеңіс Қасымбекке биыл Астанада өтетін ауқымды V Дүниежүзілік көшпенділер ойындарына дайындықты пысықтау жөнінде бірқатар міндет жүктеді.