Мәжіліс бірінші оқылымда Салық кодексін мақұлдады

Парламент мәжілісінің депутаттары жаңа Салық кодексі жобасын бірінші оқылымда мақұлдады, деп хабарлайды Orda.kz. 

Жаңа кодексті 94 депутаттың 76-сі қолдады, 7-еуі қарсылық танытты. 10 депутат қалыс қалды.

Ақыры үкімет жаңа Салық кодексі жобасында ҚҚС шегі 40 млн теңге деп белгіледі. Кейбір салалар ҚҚС төлеуден босатылды. Әлеуметтік және денсаулық сақтау саласында үкімет ҚҚС-тан босатылған дәрі-дәрмектердің тізімін жариялайды. Тек ақылы медициналық қызметтерге салық салынады. Әлеуметтік салада корпоративтік табыс салығы асықпай енгізіледі. 2026 жылдан бастап 5%, 2027 жылдан бастап 10% болады. 

Жекелеген салалар үшін салық мөлшерлемелері мынадай болады:

- Банктер үшін – 25%;

- Құмар ойын саласы үшін – 25%;

- Әлеуметтік бағыттағы мекемелер үшін – 10%;

- Өңдеу өнеркәсібі үшін – 10%;

- Ауыл шаруашылығы үшін – 3%;

Негізгі салық мөлшерлемесі 20% болып қала береді.

Айта кетейік, 2025 жылдың 20 ақпанында үкімет мәжілістің қарауына мемлекет басшысының тапсырмаларын орындауға және салық жүйесін реформалауға байланысты жаңа ұсыныс енгізді. Онда қосылған құн салығы бойынша міндетті тіркеу есебіне қою үшін шекті 20 000 АЕК-тен (78,6 млн теңге) 3 800 АЕК-ке (15 млн теңге) дейін төмендету, жекелеген салалар үшін ҚҚС мөлшерлемесін 12 пайыздан 16 пайызға дейін арттыру туралы ұсыныс болды. Дегенмен, жоба бойынша жұмыс барысында депутаттар қосылған құн салығы бойынша тіркеу шегін кем дегенде екі есеге арттыруды ұсынды.

Еске салайық, бүгін, 9 сәуір күні мәжіліс жаңа салық моделін ұсынды. 

Ал мәжіліс депутаты Асхат Аймағамбетов мәжілісте қаралып жатқан салық салудағы жеңілдіктерді  сынаған болатын. Оның пікірінше, бұған дейін мемлекетке қыруар қаржы төлеп келе жатқан «алыптардың» жеңілдік талап етуі негізсіз.