Қытайда жоғалып кеткен қазақстандықтың отбасы биліктен көмек сұрайды

Әлімнұр Тұрғанбай Қытайда 23 шілдеде ұсталды. Бұл туралы оның отбасы мәлімдеді, деп хабарлайды Orda.kz.

Тұрғанбайдың әйелі мен қызы Алматыдағы әкімдік ғимаратының алдында президентке бейнеүндеу жолдады. Олар биліктен Тұрғанбайды Отанына қайтаруға көмектесуді сұрайды.

Адам құқықтары бюросы Қазақстанның Сыртқы істер министрлігі Әлімнұрдың қамауға алынғанын растады. Мәліметке зер салсақ, Әлімнұр қос азаматтығы болған соң ұсталған.

«Алайда оның туыстары ресми түрде қытай азаматтығынан бас тартқанын айтады», деп атап өтті Қазақстанның халықаралық адам құқықтары бюросы.

Бұл отбасының билікке алғаш рет жүгінуі емес. Бұған дейін ҚХР консулдығы мен СІМ өкілдігі алдында өткен акциялар үшін оларды ұстап, айыппұл салған. Ал бұл жолы полиция ескерту жасаумен шектелді.