«Қысым көрсетіп, қорқытады»: экс-депутат Маңғыстау облысының әкімінен некесіз баласы барын мәлімдеп, Тоқаевқа жүгінді

Маңғыстау облысының тұрғыны өңір әкімі Нұрдәулет Қилыбайдан туған ұлы барын айтып, президент Қасым-Жомарт Тоқаевтан өзін әкімнің ықпалынан қорғауды сұрады, деп хабарлайды Orda.kz.

Ынташ Наурызованың айтуынша, ол 2022 жылы қазіргі облыс басшысы Нұрдәулет Қилыбайдан ұл босанған. Алайда әкім баласын мойындаудан бас тартып, әйелге қысым көрсете бастаған.

«Ұлымның әкесі – Маңғыстау облысының әкімі Қилыбай Нұрдәулет Игілікұлы. Қанша қиындық көрсем де, балама әкелік танытады деген үмітпен үндемей келдім. Тек оның тегін беріп, әкелік міндетін атқаруын сұрағаным үшін, енді маған қысым көрсетіп, қорқытып жатыр. Бұл жағдайға бір жылдан бері төзіп келемін», – деді Наурызова өз үндеуінде.

Оның айтуынша, бейтаныс адамдар оны қорқытуды жалғастырып жатыр. Ол бірнеше рет жергілікті құқық қорғау органдарына шағымданғанымен, арыздары жауапсыз қалған.

Ал Маңғыстау облысының полиция департаменті Orda.kz сауалына берген жауабында Ынташ Наурызоваға қатысты «жала жабу» бабы бойынша арыз түскенін растады. Бұл шағымды облыс әкімі аппаратының басшысы Мәлік Әбдіқадыров түсірген. Қазіргі уақытта іс сотқа жолданған.

2024 жылдың желтоқсанында өткен Орталық коммуникациялар қызметіндегі брифингте әкім Қилыбай Наурызованың мәлімдемесіне қатысты пікір білдіріп, айтылғандарды жоққа шығарды.

«Жылтырағанның бәрі алтын емес. Әлеуметтік желіде жазылғанның бәрі шындық емес. Оның ішінде сіз келтірген ақпарат та бар. Кейбірін мойындаймын, бірақ көбіне үзілді-кесілді келіспеймін», – деді ол.

Ашық деректерге сүйенсек, Ынташ Наурызова бұған дейін Маңғыстау облыстық мәслихатының депутаты болған.