КСРО-ның ыдырағанына 35 жыл, ал «ардагерлер» көбейіп барады — Тоқаев

Парламент палаталарының бірлескен отырысы басталды. Мемлекет басшысы әлеуметтік төлемдерді біріздендіру керегін айтты, деп хабарлайды Orda.kz.

Тоқаев жасанды өтемақы алатын, сондай-ақ сол жеңілдіктерді әперемін деп «көмек қолын» созатын жылпостар да көбейгенін алға тартты.

«Біз әлі күнге дейін бұрынғы КСРО аумағындағы және одан тыс басқа да аймақтардағы қақтығыстарға қатысқан азаматтарға арнайы төлемдер жасап, медициналық қызмет көрсетіп келеміз. КСРО-ның ыдырағанына 35 жыл болса да, ардагерлеріміз барған сайын «жасарып», көбейіп барады».

Әлеуметтік жеңілдіктерді қолдан көбейту – елді дамытуға, яғни мектеп, аурухана, көлік инфрақұрылымдарын және басқа да нысандар салуға жұмсалуы қажет қыруар қаражатты желге шашумен теңестірді. Сонымен қатар, толық емес отбасы деген жеңілдіктің салдарынан Қазақстан әлемде ажырасқан отбасылар «көш бастаған» елдердің қатарына қосылғанын айтып өтті.

«Осылайша, біз өзіміз жалқаулық пен масылдыққа жол беріп отырмыз. Отбасы мүшелерінің барлығы дерлік нысаналы әлеуметтік көмек пен жәрдемақы алатын болса, жұмыс істеудің не қажеті бар? Басқаша айтсақ, әлеуметтік салада оңтайлы шешім қабылдаудың орнына, Үкімет кемінде 15 жыл бойы әлеуметтік масылдық пен әлеуметтік алаяқтыққа жол беріп келді» – деді Тоқаев.

Мемлекет басшысының сөзінше, түпкі мақсат – халықтың мойнындағы қарызын азайту ғана емес, азаматтардың табысы тұрақты болуын қамтамасыз ету.

Еске сала кетсек, бүгін, 8 қыркүйек күні президент Қазақстан халқына жолдауында жасанды интеллект министрлігін құруды тапсырды.