ҚР СІМ Қазақстанның мұнай танкерлеріне жасалған шабуылға қатысты мәлімдеме жасады

ҚР Сыртқы істер министрінің ресми өкілі Ерлан Жетібаев Қара теңіздегі Қазақстан мұнайының танкерлеріне жасалған шабуылдарға байланысты мәлімдеме жасады, деп хабарлайды Orda.kz.

Өз мәлімдемесіне Жетібаев болған жағдайға ҚР СІМ алаңдаушылық білдіретінін айтты

«Қазақстан Республикасының Сыртқы істер министрлігі биылғы жылдың 13 қаңтарында Қара теңіз акваториясында Каспий құбыр консорциумының (КҚК) теңіз терминалына бара жатқан үш танкерге ұшқышсыз басқарылатын дрондардың шабуыл жасағанына байланысты үлкен алаңдаушылық білдіреді», - деп мәлімдеді Ерлан Жетібаев.

Оның айтуынша, бірқатар Еуропа елдері елшілерімен өткізілген жедел кездесулер барысында, сондай-ақ америкалық тараппен және басқа да шетелдік серіктестермен болған байланыстар кезінде көмірсутектерді тасымалдау қауіпсіздігін қамтамасыз ету үшін, соның ішінде теңіз жолдарында, халықаралық құқық нормаларын қатаң сақтай отырып, нақты әрі тиімді шаралар қабылдаудың қажеттілігі ерекше атап өтілді.

«Қазақстан Республикасы ешбір қарулы қақтығысқа қатысып отырған жоқ. Еліміз әлемдік және еуропалық энергетикалық қауіпсіздікті нығайтуға өз үлесін қосып келеді және энергия ресурстарын халықаралық талаптарға толық сай, үздіксіз жеткізуді қамтамасыз етіп отыр. Осы орайда аталған танкерлердің барлық қажетті рұқсат құжаттары болғанын және тиісті тану жабдықтарымен жабдықталғанын атап өтеміз. Соңғы кезде мұндай оқиғалардың жиілеуі халықаралық энергетикалық инфрақұрылымға төнетін қауіптердің артып келе жатқанын көрсетеді. Сондықтан болашақта осындай жағдайлардың алдын алу үшін серіктестерді бірлесіп әрекет етуге шақырамыз»,  - деп қосты Ерлан Жетібаев.

Еске сала кетейік, сейсенбі күні Қазақстан мұнайының шамамен 80%-ы өтетін Каспий құбыр консорциумы (КҚК) терминалы маңында грек компаниялары басқаратын екі мұнай танкеріне дрондармен шабуыл жасалды.

LSEG деректеріне сәйкес, танкерлердің бірі — Delta Harmony — гректің Delta Tankers компаниясының басқаруында. Бұл кеме «Теңізшевройл» консорциумы өндіретін мұнайды тиеуі тиіс болған. Екінші танкер — Matilda — гректің Thenamaris компаниясына тиесілі, ол Қарашығанақ кен орнынан алынатын мұнайды тиейтін болған. Thenamaris компаниясының өкілі Matilda танкері КҚК терминалынан маңында, жүксіз тұрған кезде екі дронның соққысына ұшырағанын растады.