Қостанай халықаралық әуежайы аукционға қойылады

Биыл Ахмет Байтұрсынов атындағы Қостанай халықаралық әуежайын жекешелендіруге дайындық шаралары жасалынып жатыр.

Ол екі рет аукционға шығарылды, бірақ аукцион жарамсыз деп танылды.

Бұл туралы Alau.kz жазады.

Соңғы рет 2018 жылы шығарылған. Содан кейін әуежай республикалық баланстан облыс әкімдігінің балансына берілді. Одан кейін ғимараттың өзін де, ұшу-қону жолағын да жөндеу басталды. Қазір қаржы басқармасының мәліметінше, әкімдік нысанды нақты қалай жекешелендіретіні шешіліп жатыр.

«Мемлекеттік мүлікті иеліктен шығарудың көптеген жолдары бар. Ол сатып алу құқығымен сенімгерлік басқаруға берілуі мүмкін болмаса тендер немесе аукцион арқылы бірнеше жолмен қойылуы мүмкін. Мемлекеттік комиссия жергілікті деңгейде мемлекеттік органдардан құралып, құзырлы органдар әдістеме бойынша шешім қабылдайды» деді Қостанай облысы әкімдігі қаржы басқармасының басшысы Алма Жүсіпова.

Қаржы департаменті қазір жекешелендірудің барлық күшін әуежайға бағыттағаны атап өтілді. Қазірдің өзінде әкімдік акцияның 49 пайызын ғана сатуға дайын екені анық. Әуежай стратегиялық нысан болып саналатындықтан, олардың негізгі пакеті мемлекетте қалады.

Қазір ресми мәлімет бойынша кәсіпорынды бағалау жұмыстары жүріп жатыр, ол сәуір айына дейін дайын болады. 2017 жылы әуежай 862 миллион теңгеге бағаланды.