Көктайғақ салдарынан еліміздің жеті күре жолында қозғалыс тоқтады

Көктайғақ пен қарлы боран салдарынан еліміздің бірқатар облысының күре жолдарындағы көлік қозғалысы тоқтатылды, деп хабарлайды Orda.kz.

Көлік министрлігінің мәліметінше, 16 желтоқсан күні таңғы сағат 4-те Жамбыл облысында нөлден төмен температурада жаңбыр жауып, жолдарда қалың көктайғақ пайда болған. Осыған байланысты облыстағы жолдар қайта жабылды.

«Ауа райы жағдайының нашарлауына байланысты (нөлден төмен температурада жауын-шашын, қарлы боран) төрт облыста: Алматы, Жамбыл және Түркістан, сондай-ақ Жетісу облысындағы республикалық маңызы бар жолдардың жеті учаскесінде көлік қозғалысына шектеулер енгізілді. Жабылған учаскелер туралы толық ақпаратты жақын арада Көлік министрлігі береді» деп хабарлады министрлік.

Еске сала кетейік, Алматы облысында Алматы-Ташкент-Термез тас жолы жабылған болатын. Бұған дейін синоптиктер 16 желтоқсанда Қазақстанның алты облысында көктайғақ күтілетінін ескертті.

«16 желтоқсанда сағат 08:50-ден бастап ауа райы жағдайының нашарлауына байланысты (нөлден төмен температурада жаңбыр, қалың көктайғақ) республикалық маңызы бар А-2 Алматы - Ташкент - Термез жолында көліктің барлық түрлері үшін қозғалыс жабылды ( 59-дан (Жаңақұрылыс ауылы) 143-ші шақырымға дейін (Жамбыл облысының шекарасы)» деп хабарлады Алматы облысының Төтенше жағдайлар департаменті.

Қазгидромет 16 желтоқсанда Қазақстанның алты облысында көктайғақ болады деп болжап отыр. Синоптиктердің мәліметінше, Атырау облысында тұман түсіп, көктайғақ болады. Тағы екі облыс – Маңғыстау және Батыс Қазақстан облыстарының жолдарында жүру қауіпті болады.

Алматы облысының таулы аймақтарында да көктайғақ күтіледі. Түркістан облысының тау бөктерінде тұманға байланысты жолдардағы қозғалыс қиындайды.

Ал Жамбыл облысының таулы аймақтарында тұман,  көктайғақ болуы мүмкін.