«Кінәсін мойындамады»: Перизат Қайрат сотқа Бауыржан Байбекті шақыруды талап етті

Қайырымдылық қорына жиналған қаражатты жымқырды деп айыпталған Перизат Қайрат өзіне тағылған айыпты жоққа шығарды. Айыптау актісі жарияланғаннан кейін ол кінәсін мойындамайтынын мәлімдеді, деп хабарлайды Orda.kz.

«Мен айыптау актісімен келіспеймін. Онда келтірілген дәлелдер негізсіз. Тергеушілердің қиялы үшін жауап бере алмаймын. Алдағы сот отырыстарында бұл айыптауларға жауап беремін», – деді сот залында Перизат Қайрат.

Сондай-ақ ол «Biz Birgemiz Qazaqstan 2030» қоғамдық бірлестігін өз бетімен құрмағанын айтты.

«Айыптау актісінің алғашқы абзацында менің анаммен бірге қор құрғаным және құжаттарды қолдан жасағаным айтылған. Алайда бұл қор бастапқыда партия бастамасымен, нақтырақ айтқанда, Бауыржан Байбектің жетекшілігімен құрылған. Құрылтайшылар қатарында мен ғана емес, партияның бұрынғы және қазіргі өкілдері де бар», – деді ол.

Сот отырысында Перизат Қайрат Алматының бұрынғы әкімі Бауыржан Байбекті сотқа шақырып, одан жауап алуды талап етті.

Бұған дейін прокурорлар Арман Кезекен мен Мадина Оразалина айыптау актісін жария етті. Онда Перизат Қайрат пен оның анасы Ғайни Алашбаеваның аса ірі көлемде алаяқтық және алдын ала сөз байласу арқылы ақшаны заңдастыру бойынша айыпталып отырғаны айтылды.