Келінін құрыққа түсірген: Әзербайжанда президент отбасын бопсалаған адам ұсталды

Әзербайжанның мемлекеттік қауіпсіздік қызметі президент Ильхам Әлиевтің отбасын бопсалаған адамды ұстады, деп хабарлайды Orda.kz Oxu.az сайтына сілтеме жасап. 

Ақпаратқа сәйкес, осы жылдың басынан бері блогерлер Мехман және Эмин Гусейновтар, сондай-ақ Габиль Мамедов президенттің келіні Алена Әлиева туралы жалған мәліметтер тарата бастаған. ІTV эфирінде президент отбасының беделіне нұқсан келтіру фактісі бойынша қозғалған қылмыстық іс материалдары мен тергеу нәтижелеріне негізделген сюжет көрсетілді.

Іс материалдарына сәйкес, шетелде тұратын адам әлеуметтік желілер, электронды пошта және шетелде тіркелген ұялы байланыс нөмірі арқылы Әзербайжанның жоғары лауазымды тұлғаларымен байланыс орнатуға тырысқан. Ол Алена Әлиеваның жеке өміріне қатысты делінген материалдарды жариялаймын деп қорқытып, 5 миллион еуро талап еткен.

Тергеу нәтижесінде Әзербайжан азаматы Ф.С. ұсталып, бопсалау әрекетін мойындап, толық түсініктеме берді. Оның айтуынша, ол Мехман Гусейновпен байланыс орнатуға тырысып, одан бейнематериалдар сұраған. Кейін бұл материалдарды делдалдар, соның ішінде Эльман Әлиев арқылы алған. Материалдарды алған соң, ол Әлиевтер отбасын бопсалауға кіріскен.

Қылмыстық іс бойынша тергеу жалғасып жатыр.

Оқи отырыңыз:

• Иран соғысында қол ұшын бермеген еуропалықтарға Трамптың өкпесі қара қазандай
• Әзербайжан Иранға гуманитарлық көмек жіберді
• Тегеран Түркия, Әзербайжан және Кипрге шабуыл жасамаған — Иран СІМ