Қажылыққа жинаған ақшасын мұқтаж жандарға үлестірген 94 жастағы ақсақалға Меккеге жолдама сыйланды

Қазақстан мұсылмандары діни басқармасының төрағасы Наурызбай қажы Тағанұлы қайырымдылық жасап, елге үлгі болған 94 жастағы Сағадат Жұмабаевқа алғыс білдіріп, оған қасиетті қажылық сапарына жолдама сыйлады, деп хабарлайды Orda.kz.

Павлодарда тұратын қария Сағадат Жұмабаев 13 жылдан бері облыс орталығында өмір сүріп келеді. Бірнеше жыл бойы қажылыққа бару үшін қаражат жинаған қария кейін денсаулығына байланысты бұл сапарға бара алмайтынын түсініп, жиған 3 миллион 600 мың теңгесін мұқтаж жандарға таратып берген.

«3 миллион 600 мың теңге жинап едім. Сол ақшаны баласы науқас 30 анаға бөліп бердім», — дейді Сағадат Жұмабаев.

Қарияның бұл ісі әлеуметтік желіде кеңінен таралып, көпшіліктің ықыласына бөленді. Бас мүфти оның ізгілігін жоғары бағалап, ақсақалға Меккеге қажылық жасауға арнайы жолдама ұсынды.