Қазақтар мен мұсылмандарды «мамбет» деген Мұхамадиева соңғы сөзінде не деді?

Қазақтар мен мұсылмандарды «мамбет» деп кемсіткен жазбалардан кейін қоғамның қатты сынына ұшыраған блогер Алика Мұхамадиева сотта өз кінәсін мойындап, соңғы сөзін айтты, деп хабарлайды Orda.kz.

Алика Мұхамадиева соттағы соңғы сөзінде өз ісіне өкініп, барша халықтан кешірім сұрады. Ол жазған жазбалары үшін қатты ұялатынын айтып, соттан рақымшылық танытуды өтінді.

«Барша ренжіген адамдардан тағы да кешірім сұраймын. Маған өте ұят, шын жүректен өкінемін. Сот үкім шығарғанда менің кінәмді мойындағанымды, өкінішімді және кішкентай қызым бар екенін ескерсеңіздер екен», – деді Мұхамадиева.

Сондай-ақ, ол сотта өз сөзінде жалғыз қызының қасында болу үшін бәрінен де бас тартуға дайын екенін, өмірдің мәнін тек ауыр сәтте түсінгенін айтты.

 «Адам кейде бәрін жоғалтқанда ғана өмірдің шынайы құнын түсінеді. Мен де соған көзім жеттім. Мақсат қуып жүріп, өмір сүруге үлгермеппін. Қызымды ата-анама қалдырып, өз жоспарларымның соңынан кеткен едім», – деді айыпталушы

Еске сала кетейік, Алика Мұхамадиева әлеуметтік желі  Threads-те қазақтар мен мұсылмандарды қорлаған жазбалар жариялаған соң қоғамда үлкен резонанс туды. Артынша оған қылмыстық кодекстің 174-бабының 1-бөлігі бойынша – «әлеуметтік, ұлттық, рулық, нәсілдік немесе діни алауыздық тудыру» бабымен айып тағылды. 

Сотта Мұхамадиева өз әрекетін сол кездегі ауыр психологиялық күйде жасағанын түсіндірді. Ол бұған дейін жол апатына түсіп, әжесінен айырылғанын да айтты.

Прокурор айыпталушыға 4,5 жыл бас бостандығынан айыру жазасын сұрады, алайда үкімнің орындалуын төрт жылға — оның қызы 14 жасқа толғанға дейін кейінге қалдыруды өтінді.