Қазақстанға қарсы арандату ұйымдастырған: Лондонда ресейлік шпиондар сотталды

Лондонның Орталық қылмыстық соты Ресейге шпионаж жасады және халықаралық арандатушылықтарды ұйымдастырды деп айыпталған Болгария азаматтарын кінәлі деп таныды, оның ішінде Қазақстанға қарсы арандатулар да болған, деп хабарлайды Orda.kz.

Bloomberg-тің жазуынша, сот Катрин Иванова, Ваня Габерова және Тихомир Иванчеваны Ресейдің барлау қызметі үшін маңызды ақпаратты заңсыз жинағаны үшін кінәлі деп таныды. Топ мүшелері 2020-2023 жылдары Ресейге шпионаж жасады. Тағы үш сыбайласы — Орлин Русев, Бисер Джамбазов және Иван Стоянов — бұрын шпионаж жасағандарын мойындаған болатын.

Процесс үш айға созылды. Сот Болгария азаматтары Ұлыбритания мен Еуропада «күрделі барлау операцияларын» жүргізу үшін тұтас бір желі құрғанын анықтады. Топ мүшелерін Ян Марсалек біріктірген — ол бұған дейін дауға қалған және банкрот болған Wirecard төлем жүйесінің бас операциондық директоры болған. Сол Марсалек шпиондардың әрекеттерін үйлестіріп, Ресейдің барлау қызметімен байланыс орнатқан. Марсалекті ұстау мүмкін болмады — қазір оның қайда екені белгісіз.

Сотталғандардың ұйымдастырмақ болған операцияларының арасында Қазақстанға қарсы арандатулар да бар. Өткен жылдың қарашасында белгілі болғандай, топ Ұлыбританиядағы Қазақстан елшілігі алдында жалған наразылық акциясын ұйымдастыруды жоспарлаған, сондай-ақ Атырау облысының бұрынғы әкімі, 71 миллиард теңге жымқыру ісі бойынша күдікке ілінген Бергей Рысқалиевқа қастандық жасауға ниеттенген. 

«Марсалек Ивановаға, Габерова мен Иванчевқа Лондонда бұрынғы Қазақстандық саясаткердің артынан бақылау жүргізу үшін күніне үш мың фунт жұмсауға рұқсат берген» деп жазады Bloomberg. 

Шпиондық топқа Марсалек бөлген жалпы бюджет шамамен 45 мың фунт (қазіргі валюта бағамымен 28,5 миллион теңгеден астам) болды. Дегенмен, сотталғандар Қазақстанға қарсы арандатуларды ұйымдастыруға кіріспеді.