Қазақстандық әуе компаниялары Еуропаға шектеусіз ұша алады

Жақында қазақстандық әуе компанияларына Еурокомиссияның қара тізіміне түсіп қалу қаупі төнді, бұл ЕО елдеріне ұшуға тыйым салуды білдіреді.

Бұл туралы Көлік министрлігі хабарлайды.

Алайда қазір Еуропаға ұшуға барлық шектеулер алынып тасталды. Мұндай шешім Еуропалық Одақтың авиациялық қауіпсіздік комитеті отырысында қабылданды.

«Еурокомиссия Қазақстанның авиациялық қызметіне күшейтілген мониторингті аяқтау туралы шешім қабылдады» делінген ЕК авиация департаментінің директоры Филипп Корнелистің 30 мамырдағы хатында.

Отандық компаниялардың техникалық бағалаудан сәтті өткені хабарланды. Атап айтқанда, еуропалық сарапшылар сертификаттау, бақылау, ұшу жұмысын қадағалау және авиациялық персоналды оқыту жүйесінде айтарлықтай жақсарғанын атап өтті.