Қазақстан ауыл шаруашылығы өнімдерінің экспортын арттырды

Алты айда ауыл шаруашылығы өнімдерінің экспорты өткен жылдың сәйкес кезеңімен салыстырғанда 5%-ға (2,6 млрд доллардан 2,7 млрд долларға дейін) өсті.

Ауыл шаруашылығы министрлігінің мәліметі бойынша, биыл бірінші жартыжылдықта өсімдік шаруашылығы өнімдерінің экспорты 1,56 млрд долларды құрады, бұл өткен жылдың 6 айымен салыстырғанда (1,49 млрд доллар) 4,7%-ға артық. Бұл ретте мал шаруашылығы өнімдерінің экспорты 80 млн долларды құрады, бұл өткен жылдың 6 айымен салыстырғанда (67,8 млн доллар) 18%-ға жоғары.

Бірінші жартыжылдықта өңделген ауыл шаруашылығы өнімдерінің экспорты 1,1 млрд долларды құрады, бұл 2022 жылдың 6 айымен салыстырғанда (1 млрд доллар) 5%-ға артық. Көрсетілген кезеңде ауыл шаруашылығы өнімдері экспортының жалпы көлеміндегі қайта өңдеу өнімдерінің үлесі 40,1%-ды құрады.

Айтпақшы, сыртқы нарыққа жеткізілетін ауыл шаруашылығы өнімдерінің бестігіне бидай, ұн, күнбағыс майы, зығыр тұқымы және арпа кіреді.