Қазақ тілінің мәртебесі төмендеді деп байбалам салудың қажеті жоқ – Тоқаев

Астанадағы Қасым-Жомарт Тоқаевтың қатысуымен барлық деңгейдегі мәслихат депутаттарының ІІІ республикалық форумы өтіп жатыр, деп хабарлайды Orda.kz.

Жиында Конституциялық өзгерістер мен тіл саясатына қатысты қоғамда айтылып жүрген пікірлер де назардан тыс қалмады. Соның ішінде жаңа Конституция жобасында орыс тілінің мәртебесі төмендетіледі деген әңгімелерге қатысты пікірлер айтылды.

«Жаңа Конституция жобасында орыс тілінің мәртебесін төмендетіп жатыр-мыс деген күңкіл әңгімеге қатысты да осыны айтуға болады. Бұл жайында жазылған мақалаларды оқудың өзі қызық. Стилистикалық және грамматикалық қателерден аяқ алып жүре алмайсың. Жарияланым авторлары орыс тілі үшін қам жейді, бірақ өздері оны дұрыс меңгермеген», – деді Қасым-Жомарт Тоқаев.

Президенттің айтуынша, Конституция жобасының қазақ және орыс тілдерінде, бірдей заңды күшке ие нұсқада жариялануының өзі көп нәрсені аңғартады және қосымша түсіндіруді қажет етпейді.

«Осы орайда қазақ тілінің мәртебесі төмендеді деп байбалам салудың қажеті жоқ. Жаңа Конституция жобасында «Қазақстан Республикасының мемлекеттік тілі – қазақ тілі» деп нақты жазылған», – деді Мемлекет басшысы.

Оқи отырыңыз:

• Қазақстанда Референдум 15 наурызда өтеді
• Жаңа Конституция жобасы референдумға шығаруға дайын