«Қалыңдық қаза тапты»: Алматыда қыз алып қашқан көлік апатқа ұшырады

Алматы облысында қыз алып қашқан көлік жол апатына ұшырап, қалыңдық көз жұмды. Бұл ақпаратты облыстық полиция департаменті растады, деп хабарлайды Orda.kz.

Қайғылы оқиға 24 мамыр күні сағат 18:00 шамасында БАКАД автожолының 36-шақырымында болған.

«Kia маркалы көліктің жүргізушісі Mercedes-Benz көлігімен соқтығысқан. Соның салдарынан Mercedes-Benz аударылып, салонда болған жолаушы оқиға орнында қаза тапты. Жүргізуші мен түрлі жарақат алған екі жолаушы ауруханаға жеткізілді»,  деп хабарлады облыстық полиция департаменті.

Ведомство қайтыс болған қыздың қалыңдық екенін растады.

Оқиғаға байланысты қылмыстық іс қозғалды.

«Көлік жүргізушісі ұсталып, уақытша ұстау изоляторына қамалды. Қазіргі уақытта аталған факт бойынша сотқа дейінгі тергеу амалдары жүргізіліп жатыр. Болған оқиғаның барлық мән-жайы анықталып жатыр»,  деп мәлімдеді полиция.