Қайрат Сатыбалды мемлекетке 44,6 млрд теңге қайтарды

Қаражат мемлекетке келтірілген залалды өтеу есебінен республикалық бюджетке жіберілді, деп хабарлайды Orda.kz.

Сыбайлас жемқорлыққа қарсы қызмет Қайрат Сатыбалдыұлына қатысты қылмыстық істерді тергеу шеңберінде мемлекетке 2024 жылдың басынан бастап қосымша 44,6 млрд теңге қайтарылды. Мұны Антикор төрағасы Асхат Жұмағали құрылымдық және аумақтық департамент басшыларымен жедел кеңес кезінде айтты.

«Қазіргі уақытта қаражат мемлекетке келтірілген залалды өтеу есебінен республикалық бюджетке жіберілді» деп хабарлады ведомство басшысы. 

Сонымен қатар кездесуде цифрлық технологияларды енгізу, оның ішінде «ақшаны бояу» тетіктері мен «цифрлық теңгені» пайдалану мәселелері талқыланды.

 «Бюджеттен бөлінген қаржы түпкі мақсатына жетуі керек. Біздің сүйемелдеуіміздегі құрылыстары ұзаққа созылған нысандардың уақтылы берілмей, сапасыз салынуы көбіне ақшаны жымқыру немесе шенеуніктерге одан әрі кері қайтару салдарымен және басқа да құқық бұзушылықтармен байланысты екенін бәріміз білеміз. Цифрлық теңге құрал ретінде «ақшаны бояу» институтын іске асыруға септігін тигізеді. Цифрлық теңгенің алгоритмдері болғандықтан, өзінің іздері бар. Мысалы, қаражат жалақыға бөлінсе, басқа бағытқа кетпей, еңбекақы, тауарлар мен қызметтерді сатып алу және салық төлеу бойынша игеріледі. Бөлінген қаржы қозғалысының рәсімдері ашық болып, барлық аударым өз мақсатына жетіп, әр теңге көзделген мақсатына жұмсалуға тиіс», - деді ол.