Юрий Ильиннің ұлы жоғарғы қызметтен кетті

«KMG PetroChem» ЖШС басқарма төрағасы лауазымынан Игорь Ильин кетіп, оның орнына Диаз Диянов тағайындалды, деп хабарлайды Orda.kz. 

Бұл туралы «ҚазМұнайГаз» компаниясының ресми Telegram-арнасына мәлімдеді, 

«ҚазМұнайГаз» ҰК» АҚ-ның ресми ақпаратына зер салсақ, «KMG PetroChem» ЖШС басқарма төрағасы қызметіне Диаз Мұхтарұлы Диянов тағайындалды.

Компания ұжымына жаңа басшыны «ҚазМұнайГаз» ҰК АҚ басқарма төрағасының орынбасары Дастан Абдулғафаров таныстырды.

«Диаз Диянов 1983 жылы Ақмола облысында дүниеге келген. Ол әр жылдары «ҚазМұнайГаз Өнімдері» АҚ, «ҚазМұнайГаз – өңдеу және маркетинг» АҚ, «ҚазМұнайГаз» ҰК АҚ, «АНПЗ» ЖШС және «KPI Inc.» ЖШС сынды компанияларда жұмыс істеген. Мұнай-газ саласында 20 жылдан астам, соның ішінде «ҚазМұнайГаз» құрылымында 15 жылдық тәжірибесі бар»,  деп мәлімдеді Дастан Абдулғафаров.

Жаңа қызметке дейін «KMG PetroChem» ЖШС басқарма төрағасының бизнес-даму жөніндегі орынбасары лауазымын атқарған.

Айта кетейік, Игорь Ильин — бұрынғы Төтенше жағдайлар министрі Юрий Ильиннің ұлы.