Электр көліктерін, сиыр етін бажсыз әкелу: ЕАЭО елдері қандай келісімге келді

ЕЭК Кеңесінің кезекті отырысында Еуразиялық экономикалық одақ елдерінің өкілдері интеграциялық кедергілерді жойып, сауда-экономикалық қатынастарды жеңілдететін бірқатар шешімдер қабылдады, деп хабарлайды Orda.kz.

Қазақстан ЕАЭО-ға мүше мемлекеттердің мемлекеттік сатып алулары аясында сатып алынатын тауарлардың тізбесін біртіндеп кеңейтіп жатқанын атап өткен жөн. Тағы бір зат қосылды - киім мен аксессуарлар, соның ішінде кәдімгі қолғаптар мен резеңке қолғаптар.

Биылғы жылы отандық бизнесмендерге ЕАЭО-ға мүше басқа мемлекеттердің 63 тауар түрі бойынша мемлекеттік сатып алуларына қолжетімділік қамтамасыз етілді. Сонымен қатар, өндірістік және технологиялық операцияларды жүргізу үшін біркелкі жағдайлар қарастырылмаған 276 өнім атауына СТ-1 сертификатын пайдалану мүмкіндігі бір жылға ұзартылды.

ЕАЭО-ға мүше мемлекеттердің кедендік шекарасы мен аумақтарында ветеринарлық бақылауды жүзеге асырудың бірыңғай тәртібіне де өзгерістер енгізілді. 

Атап айтқанда, бірқатар терминдер түзетілді, ветеринарлық сертификаттардың нысандары, ветеринарлық, дәрілік, диагностикалық, дезинфекциялық және басқа да өнімдерді, сондай-ақ жемшөп қоспаларын әкелу және тасымалдау шарттары анықталды. 

Ветеринарлық бақылау кезінде зертханалық зерттеулерді ұйымдастыруға қатысты стандарттар да толықтырылды.

ЕЭК Кеңесі 2024 жылға арналған ЕАЭО елдеріне сиыр етін бажсыз әкелуге квоталар бекітті. Қазақстанның бұл ет түрін өндіруі ішкі қажеттіліктерді толықтай дерлік өтейтінін ескерсек, біздің ел үшін квота көлемі ең аз – 5 мың тонна болып белгіленді. 

Ресей үшін – 100 мың тоннаға дейін, Армения – 8,5 мың тоннаға дейін, Беларусь – 7,5 мың тоннаға дейін, Қырғызстан – 3,5 мың тоннаға дейін. Импорттық сиыр етінің қосымша көлемі өңдеуге жіберіледі. Бұл шара еліміздегі шұжық және басқа да ет өнімдер құнын арзандатады деп күтілуде.

Сондай-ақ ЕАЭО-ға мүше мемлекеттерге электромобильдерді бажсыз әкелу екі жылға (2025 жылдың 31 желтоқсанына дейін) ұзартылды. Бұл электромобиль нарығын одан әрі дамытуға, қуаттау инфрақұрылымын дамытуға және ірі қалалардағы экологиялық жағдайды жақсартуға ықпал етеді.