Израиль Сириядағы әскери нысандарға шабуыл жасады

Сирияның қорғаныс министрлігі Израиль армиясының Дамаск провинциясындағы әскери нысандарға әуеден соққы бергенін хабарлады.

SANA агенттігінің хабарлауынша, шабуыл алдыңғы күні таңертең болған. Израиль жауы басып алынған Сирияның Голан төбелерінен әуе шабуылын жасап, Дамаск провинциясындағы бірқатар әскери позицияларға соққы берді.

«Біздің әуе шабуылына қарсы қорғаныс жүйелері зымырандарға жауап беріп, олардың бірнешеуін атып түсірді. Агрессия тек материалдық шығынмен шектелді» делінген Сирия Қорғаныс министрлігінің мәлімдемесінде.

Бұған дейін Израиль әскері Сириядағы Алеппо мен Дамаск әуежайларына да бірнеше рет шабуыл жасаған.