Израиль СІМ басшысымен Газа секторынан қазақстандықтарды эвакуациялау мәселесі талқыланды

11 қараша 2023 10:34 Ләззат Сұңқар

Қазақстан Республикасының Сыртқы істер министрі Мұрат Нұртілеу телефон арқылы сөйлесу барысында әріптесі Израиль Сыртқы істер министрі Эли Коэннен Қазақстан азаматтарын Газа секторынан эвакуациялауға көмек көрсетуді сұрады, деп хабарлайды Orda.kz СІМ баспасөз қызметіне сілтеме жасап.

Нұртілеу бұл еліміз үшін бірінші кезектегі міндет екенін қадап айтты. Сондай-ақ ол қазақстандықтардың туған жеріне тезірек оралуын қамтамасыз ету үшін Мысыр билігімен бірлесіп жұмыс істеу туралы айтты.

Израиль СІМ басшысы берген ақпараты үшін әріптесіне алғысын білдіріп, өзінің жеке бақылауында болатын қазақстандық азаматтарды эвакуациялау мәселесін шешуге бар күш-жігерін салатынына сендірді. Коэн сондай-ақ Таяу Шығыстағы қазіргі жағдай туралы баяндады.

«Нұртілеу қақтығыстың өршуіне және ұрыс аймағындағы жағдайдың дамуына алаңдаушылық білдірді. Ол қазіргі қақтығысқа қатысты Қазақстанның ұстанымын айтып, тараптарды Таяу Шығыста бейбітшілік пен тұрақтылық орнату жолдарын іздеуге шақырды, өйткені бұл мәселе бүкіл әлемдік қоғамдастық үшін жаһандық маңызы бар» деп түсіндірді ҚР Сыртқы істер министрлігінің баспасөз қызметі.

Әңгіме барысында тараптар сауда-экономикалық, инвестициялық және мәдени-гуманитарлық салалардағы екіжақты қарым-қатынастардың прогрессивті сипатын да талқылады.

Қазақстан Республикасы Сыртқы істер министрлігінің мәліметінше, Газада 100-ден астам қазақстандық бар. Бұл ретте эвакуацияға көмектесуге тырысқан алматылықтар ондағы қандастарымыздың санын 160-тан астам адам деп есептейді.

Қазақстандықтар әртүрлі себептермен анклавқа тап болды: кейбірі үйленіп, жұбайының отанына кетті, кейбірі жақындарына қонаққа, кейбірі жұмыс бабымен сонда қалған.

Жаңалықтар

барлық жаңалықтар