Илон Маск Ресейден саяси баспана сұрады

Ресейдің сыртқы істер министрлігі Илон Маскқа саяси баспана беру туралы өтініш түскенін мәлімдеді, деп хабарлайды Orda.kz.

Бұл туралы Санкт-Петербург халықаралық экономикалық форумында мемлекеттік дума төрағасының орынбасары Владислав Даванков хабарлады.

«Илон Маск бір қателіктер жіберген шығар. Бірақ ондай қателіктерді кешіруге болады деп ойлаймын. Егер ол жақта жағдайы қиындаса, біз оны қабылдауға дайынбыз. Ол – технология мен көрегендік жағынан өте ерекше тұлға», – деді Даванков.

Депутат өтінішті нақты кім жолдағанын айтпады. Алайда, оның сөзінше, СІМ бұл өтінішке бір ай ішінде жауап беруі мүмкін. Илон Маск әзірге бұл жағдайға қатысты пікірін айтпады. Ресейдің сыртқы істер министрлігі де түсініктеме бермеді.

Айта кетейік, осы айдың басында АҚШ президенті мен SpaceX негізін қалаушы Илон Маск арасында дау болып, екеуі де бір-бірін ашық сынаған болатын. Кейін олардың қайта татуласқанын БАҚ жарыса жазды. 

Еске сала кетейік, Иранда бір апта бойы болып жатқан қанды қақтығыстардан кейін қазақстандық азаматтардың бір бөлігі Әзербайжан арқылы эвакуацияланды.