Хасан Қасымбаевтың сотында бейнематериалдарды зерттеу басталды

Алматы облысының Талғар қалалық сотында Хасан Қасымбаевтың бейнекамераға түскен материалдарын зерттеу басталды, деп хабарлайды Orda.kz.

Сот залында айыпталушылардың Арман Әлімовті қалай соққыға жыққаны түскен бейнематериалдар қаралып жатыр.

Ол Қасымбаевтың жеке адамға және мүлікке қатысты ауыр қылмыс жасағанын мәлімдеді.

«Тергеу деректеріне сәйкес, Қасымбаев пен сыбайластары кәсіпкер Әріпжан Тәжиевтен ақша бопсалау мақсатында оған күш қолданған. Олар жәбірленушіні алдап алып шығып, соққыға жығып, 1 миллион теңге талап еткен. Салдарынан Тәжиев ауыр жарақат алып, медициналық көмекке жүгінген», – деді прокурор.

Ал өзіне тағылған айыптарды Хасан Қасымбаев жоққа шығарды.

Тағы бір жәбірленуші Арман Әлімов өз нұсқасын айтқан болатын.

«2021 жылдың жазында топтың басшысы Ғалымжанов Мадияр мен Қалмұратов Талғат жаттығудан қайтып келе жатқанда оларға шабуыл жасады. Оқиғадан кейін мен ауруханаға бардым. Ол маған барлық жағдайды айтып берді. Осыдан соң екі апта бойы белгісіз көлік мені аңдып жүрді. Кейін дүкенде бес адам шабуыл жасады. Мадияр қолын беріп амандасты да, бірден соққы жасады. Қол жұмсап, тепкіледі, есімнен танып қалдым. Есімді жисам, көліктің артында отыр екенмін. Руслан Әлиев аяғымнан, Сайлау Ақтанов басымнан, ал Ғалымжанов денемнен ұстап тұрды. Қолдарында ағаш және темір шоқпарлар болды», – деді ол. 

Еске сала кетсек, 2024 жылғы 4 қазанда «Қамажай» дүкенінде болған жанжалда Шерзат Полат қаза тапты. Бұл оқиға қоғамды дүр сілкіндірді. Осы істен кейін Хасан Қасымбаевтың аты аталып, оны «хуторлықтар» деген қылмыстық топтың басшысы деген сөз тарады. Бұл жағдайдан кейін Талғар аудандық әкімдігінде қызмет атқарған Хасан Қасымбаевтың бауыры Аслан Қасымбаев жұмыстан босатылды. Ресми сот кабинеті дерегіне сүйенсек, Хасан Қасымбаевтың тағы бір бауыры Ержан Қасымбаев бұған дейін «адам өлтіру» бабымен істі болған. Ол кеден қызметкері Медет Жамашевті қасақана өлтірді деп айыпталған. Ал ІІМ «хуторлық» қылмыстық топ жайлы сөз бұрқ ете қалғанда-ақ ақпаратты жоққа шығарған болатын. 

Orda.kz тілшісіне берген сұхбатында Хасан Қасымбаев: «менің арым таза, заң бұзған жоқпын» деген еді. Алайда 4 қараша күні ол қамауға алынып, оған қатысты тергеу басталды. Тергеу шілде айында аяқталды. 29 шілдеде прокуратура айыптау актісін бекітіп, істі сотқа жіберді.