Голан төбесінде Қазақстан туы желбіреді

Жақында қазақстандық әскери қызметшілер келген «Фауар» бітімгершілік базасында Қазақстанның мемлекеттік туы салтанатты түрде көтерілді. Қазақстандық бітімгершілік контингенті Сириядағы атысты тоқтату режимінің сақталуын қадағалайтын болады, деп хабарлайды Orda.kz.

ҚР Қорғаныс министрлігінің мәліметінше, Фауар базасында 139 қазақстандық бітімгершілік қызмет атқарады. Олар Сириядағы қақтығысқа қатысушы тараптардың атысты тоқтату режимін сақтауын қамтамасыз етеді.

«Біріккен Ұлттар Ұйымының Қазақстанға бітімгершілік миссиясын дербес орналастыру және орындау мандатының берілуі біздің әскери қызметшілеріміздің дайындығының жоғары деңгейін және еліміздің әлемдік аренадағы беделінің артып келе жатқанын мойындаудың дәлелі» деп  атап өтті Қорғаныс министрлігі.

Қазақстандық контингент қолбасшылық миссиясының запастағы ротасы қызметін атқаратын болады. Олардың міндеттеріне патрульдеу, қауіпсіздікті қамтамасыз ету, бақылау-өткізу пункттерін нығайту және миналардан тазарту кіреді.

Наурыздың ортасында Фауар базасына қазақстандық бітімгершілік күштері келді.