Glovo курьерлерінің келіссөз нәтижелеріне көңілі толмады

Glovo жеткізу сервисінің курьерлері компания басшылығымен және Алматы кәсіпкерлік басқармасымен жүргізілген келіссөз нәтижелеріне көңілі толмады.

Бұл туралы Orda.kz хабарлайды.

Glovo қазақстандық кеңсесінің басшылығы курьерлер мәлімдеген кейбір мәселелерді шешіп жатқанын айтады. Алайда, олар компанияның жаһандық саясатына сілтеме жасай отырып, негізгі тапсырыстар үшін де, қос тапсырыстар үшін де сыйақы мөлшерлемелерін қайта қарастырмайды.

Қақтығыс тараптары кеше өткен Glovo курьерлерінің ереуілінен кейін Алматы кәсіпкерлік басқармасының кеңсесінде кездесті. Ведомство басшысы Еркебұлан Оразалиннің талабы бойынша бұқаралық ақпарат құралдары келіссөздерге жіберілмеді.

Курьерлер үш талап қойды:

• Glovo қосымшасын Яндекс. Карта және 2ГИС қызметтерімен жұмыс істеуге бейімдеу;
• мейрамханаларда тапсырыстарды күту үшін өтемақыны көбейту;
• қос тапсырыстарды толығымен төлеу.

Glovo Қазақстан бас директоры Кәрім Богуспаев үш талаптың алғашқы екеуі бойынша жұмыс жүріп жатқанын, алайда үшінші талап компанияның жаһандық саясатына байланысты қанағаттандырылмайтынын мәлімдеді.

Курьерлер кәсіподақтың ресми тіркеуінен кейін шілде айының соңында басшылықпен диалогқа қайта оралуды жоспарлап отыр.

Еске салайық, шамамен бір ай бұрын, Wolt компаниясының курьерлері ереуілге шыққан. Олар өздерінің бұрынғы төлемақыларын қайтаруды талап еткен болатын. Содан кейін қала билігі келіссөздерге араласып, ереуілге шыққандардың талаптары орындалды.