Ертеңнен бастап негізгі ҰБТ-ға өтініш тастауға болады: Тестілеу қашан басталады?

Негізгі ҰБТ-ға 11-25 сәуір аралығында өтініш қалдыруға болады. Осы кезеңде талапкерлерге негізгі ҰБТ-ны екі рет тапсырып, ең жоғары нәтижесімен грант конкурсына қатысу мүмкіндігі беріледі. 11-16 сәуір аралығында өтінішті бір рет, ал 17-25 сәуір аралығында қалауы бойынша екінші рет өтініш бере алады. Тестілеудің өзі 10 мамыр мен 10 шілде аралығында өтеді, деп хабарлайды Orda.kz. 

Ұлттық тестілеу орталығының мәліметінше, ҰБТ-ға қатысу үшін өтініш қабылдау app.testcenter.kzсайты немесе UTO.kz қосымшасы арқылы жүргізіледі. Талапкерлерге тестілеу күнін, уақытын және пунктін таңдау мүмкіндігі берілген.

Сонымен қатар, биыл Ұлттық бірыңғай тестілеудің форматы өзгеріссіз қалады. Талапкерлер үш міндетті және таңдауы бойынша екі бейіндік пәнді тапсырады.

Тестілеу уақыты – 4 сағат (240 минут). Ал ерекше білім беру қажеттіліктері бар балалар үшін қосымша 40 минут уақыт сақталады. 

Емтихан кезінде калькулятор, химиялық элементтердің периодтық жүйесі және тұздардың ерігіштік кестесін алып кіруге болады.

Тест тапсырушылар тестілеу аяқталғаннан кейін 30 минут ішінде апелляцияға өтініш бере алады.

2026 жылғы ҰБТ аяқталғаннан кейін, 31 қазанға дейін бейнежазбаларға талдау жүргізіледі. Тыйым салынған заттарды пайдалану немесе басқа да ережелерді бұзу фактілері анықталған жағдайда, талапкердің ҰБТ нәтижелері жойылады.

Оқи отырыңыз:

• Наурыз ҰБТ: Ереже бұзған 264 талапкердің нәтижесі жойылды
• ҰБТ дайындық: Ең тиімді әдістер мен кеңестер