Елімізде 217 елді мекенді су басу қаупі бар

Наурыздың бірінші онкүндігінде елдің шығыс және оңтүстік аймақтарында бір мезгілде жауын-шашын мол түсіп, ауа температурасы көтерілді. Қазақстан бойынша 217 елді мекенді су басу қаупі бар. 

Төтенше жағдайларды жою департаменті бастығының міндетін атқарушы Жомарт Асқаровтың айтуынша, жыл басынан бері еліміздің 10 өңірінде су тасқыны дерегі тіркелді. 

«Шымкентте екі тұрғын үйді және Шығыс Қазақстан облысының Риддер қаласында 28 саяжай үйді су басты. Сондай-ақ, Абай, Атырау, Алматы, Жамбыл, Жетісу, Шығыс Қазақстан, Қарағанды, Маңғыстау, Түркістан облыстарындағы тұрғын үйлердің аула аумақтарын су басу фактілері тіркелді», - деді ол орталық коммуникациялар қызметінде өткен баспасөз конференциясында.