Дубайдағы жаппай төбелес: сегіз өзбекстандық өмір бойына бас бостандығынан айырылды

25 қаңтар 2026 10:04 Ләззат Сұңқар

Фото: Pixabay

БАӘ соты Өзбекстанның сегіз азаматын өмір бойына бас бостандығынан айыруға үкім шығарды. Тағы бір айыпталушы 25 жылға түрмеге қамалды. Бұл ақпаратты Өзбекстанның Сыртқы істер министрлігі растады, деп хабарлайды Orda.kz.

Жаппай төбелес 2025 жылдың сәуір айында Дубайдағы жанармай құю бекеттерінің бірінде болған. Жергілікті полицияның мәліметінше, қақтығыс салдарынан Өзбекстанның екі азаматы қаза тапқан: біреуі пышақ жарақатынан оқиға орнында көз жұмса, екіншісі ауруханада комадан шықпай қайтыс болған.

Тергеу деректеріне сәйкес, төбелес бұрыннан бір-бірін танитын екі топ арасында болған. Қақтығыстың себебі — бұрыннан келе жатқан жеке бас жанжалы. Барлық қатысушылар бейнебақылау камераларының жазбалары мен куәгерлердің айғақтары арқылы анықталып, кейін басқа эмираттағы қонақ үйлердің бірінде ұсталған.

Бұл іс бойынша барлығы Өзбекстанның 15 азаматы қамауға алынды. Осы деректерді нақтылау үшін Өзбекстан дипломаттары Дубай қылмыстық іздестіру басқармасының басшылығымен кездесу өткізген. Сол кезде басқарма өкілдері: «Соңғы уақытта Өзбекстан азаматтары тарапынан заң бұзу жағдайларының көбеюі екі ел арасындағы визасыз режимге әсер етуі мүмкін», деп атап өткен.

«Қазіргі таңда тиісті органдар мен біздің дипломатиялық өкілдіктер жағдайды толық зерделеп, азаматтарымыздың құқықтарын қорғау үшін барлық қажетті шараларды қабылдап жатыр», — деп мәлімдеді СІМ өкілдері.

Еске салайық, 2025 жылдың наурыз айында раввин Цви Коганды өлтірді деген айып тағылған Өзбекстанның үш азаматы өлім жазасына кесілген болатын. Осы резонансты қылмыстан кейін Абу-Даби билігі Өзбекстанның көптеген ер азаматтарына елге кіруге тыйым салды, деп жазады gazeta.uz. Кейбір жолаушылар елге келген сәтте ұсталып, қайтадан отандарына жіберілген.

Оқи отырыңыз:

Жаңалықтар

барлық жаңалықтар