«Досаевтың кезінде де болған»: Алматыда бюджет ақшасына алған қыштарды неге жеке үйге тасыды?

Қоғам белсендісі Санжар Боқаев өзінің әлеуметтік желідегі парақшасында Алматыдағы бюджет ақшасына алынған құрылыс материалдарының қолды болуы мүмкін екенін айтты, деп хабарлайды Orda.kz.

27 тамыз күні таңертең 12 ай аллеясында Боқаев бюджет ақшасына сатып алынған жаңа қыштарды алып, жүк көлігіне салып жатқан жұмысшыларды байқап, оларды аңдыды. Олар Жандосов ауылына дейін жетіп, жеке үйдің жанындағы тастардың қасына қыштарды түсіре бастады.

Кейін белсенді полиция шақырып, тергеу тобын іске қосуды талап етті.

«Қыштар өте жақсы жағдайда. Ауыстырудың керегі жоқ. Олар оны алып тастап, орнына сәл басқаша тас төсемдер төсейді. Ал ескісін сатып жібереді. Ақша игеріледі, материал кетеді», – деді Боқаев.

Уәлиханов көшесіндегі аумақты абаттандыруға бюджеттен 490 миллион теңге жұмсалды. Қаланың екі жүзден астам көшесіне әлі күнге дейін асфальт төселмей тұрғанда бұл ақша босқа кетіп жатыр.

Боқаевтың мәліметінше, жүк көліктерінің бірі оқиғадан кейін қышты түсіруден бас тартып, Алматыдағы әкімдік базасына қайтарған. Белсендінің пікірінше, бұл материалдың  талан-таражға түскенінің дәлелі.

Сонымен қатар, Боқаев жүк түсіріліп жатқан көшенің жанында тұратын алматылық әйелмен сөйлесті.

«Мен олардан не үшін алып бара жатқанын сұрадым. Тым болмаса біздің аулаға алып келе салса болады ғой», – деді әйел. 

Белсендінің айтуынша, мұндай схема бұрынғы әкім Ерболат Досаевтың кезінде де болған және  бұл істі ҰҚК-ның сыбайлас жемқорлыққа қарсы қызметіне тапсыратынын айтты.