«Диплом қорғатқызбады»: Алматыда бір студентті қылмыскер секілді күштеп әскерге әкетті

Алматы облысы Іле ауданында студентті күштеп әкеткен әскери бөлімнің қызметкерлеріне ата-аналар наразы болды, деп хабарлайды Orda.kz.

Алматы облысы Іле ауданының Өтеген Батыр кентінде аудандық қорғаныс істері басқармасы қызметкерлерінің қатігез әрекеттеріне қатысты дау шықты.

Бүгін таңғы сағат 9 шамасында оның ұлы «Прогресс» колледжіне диплом жұмысын қорғауға бара жатқан. Алайда оқу орнына жетпей, колледждің кіреберісінде оны тоқтатып, күшпен көлікке отырғызған.

«Оған колледжге кіріп үлгеруге мүмкіндік бермеді. Қасында болған 70 жастағы анамды иығымен итеріп жіберді. Ол қатты күйзеліске түсті. Ұлымды қылмыскердей әкетті. Дөрекі сөйлеп, қорқытты. Оны әскери бөлімге жеткізіп, бес сағаттай ұстады. Дипломын қорғауға да мүмкіндік бермеді», — дейді анасы.

Әйелдің айтуынша, ұлының денсаулығына байланысты ресми түрде әскери қызметтен босатылғаны жөнінде құжаты бар. Ол мұндай жағдай бірінші рет болып отырған жоқ деп отыр.

«Бұл не сұмдық? Елде әскери жағдай жарияланды ма? Балаларға неге оқуын аяқтап, дипломын алуға мүмкіндік бермейді? Бұл үшін кім жауап береді? Біз бұл бассыздықты тоқтатуды талап етеміз!» — деп ашынды студенттің анасы.

Жігітті Іле аудандық Қорғаныс істері басқармасының қызметкерлері ұстаған. Содан оны Титова көшесі, 30а мекенжайындағы әскери бөлімге апарған. Айта кетейік, студенттер 30 маусымға дейін студент мәртебесін сақтап, оқу орнында болуға толық құқылы.

Ата-аналар мен қоғам өкілдері Қорғаныс министрлігі мен жергілікті биліктен түсініктеме талап етіп жатыр.

Еске сала кетсек, өткен жылы қазанның 8-і күні Қарулы Күштер Бас штабының ұйымдастыру-жұмылдыру жұмыстары басқармасының бастығы Фархат Айдарбеков елімізде әскерге шақырылғандарды көшеде ұстап алу фактілерін растаған еді. Бұған дейін тілшіміз Түркістанда әскерилер өз еркінен тыс күштеп әскерге алып кеткен Бехруз Равшанбеков туралы жазған болатын. Ол әскери комиссариатта қорлық көріп келген. Соңында 27 сәуір күні қысымға шыдамаған Бехруз 2-қабаттан секіріп кеткен. Адвокаттың айтуынша бұл әскери міндеттен жалтару емес, амалсыздықтан өзіне-өзі қол салу. Толығырақ тілшіміздің материалынан оқыңыз.