Дикий Арманды 20 жылға қамаған судьяның лауазымы жоғарылады

Дикий Арманның ісін қараған судья Асхат Әшірбеков Қазақстан Республикасының Әскери сотының сот алқасының төрағасы болып тағайындалды, деп хабарлайды Orda.kz.

Асхат Әшірбеков 2022 жылғы қаңтар оқиғалары бойынша Дикий Арман деген атпен танымал Арман Жұмагелдиевке қатысты даулы қылмыстық істі қарады. Сот үкімі 2025 жылдың 27 қаңтарында жарияланды. Сот Дикий Арманды 20 жылға бас бостандығынан айырды.

Асхат Әшірбеков 1981 жылы Қарағанды қаласында дүниеге келген, Қарағанды ІІМ академиясын тәмамдаған, заң ғылымдарының кандидаты. 2002 жылдан бастап Қарағанды облысының ішкі істер органдарында түрлі офицерлік лауазымдарда жұмыс істеген.

2018 жылдың қазан айында Асхат Әшірбеков Алматы қалалық сотының судьясы болып тағайындалды. Екі жылдан кейін ол Алматы қаласындағы қылмыстық істер бойынша мамандандырылған ауданаралық сотының төрағасы болды.

Еске сала кетсек, Қаңтар оқиғасы бойынша басты айыпталушылардың бірі болған Арман Жұмагелдиев 20 жылға сотталған еді. 

Ал Жұмагелдиев Orda.kz-ке берген сұхбатында ешкімді ешқайда апармағанын, «ұстаған» адамдардың барлығын ҰҚК қызметкеріне тапсырғанын мәлімдеген. Бірақ сот бұл нұсқамен келіспеді.