Депутаттар азаматтық-құқықтық шартқа тыйым салып, шетелдіктердің айлығын қысқартпақ

Депутат Асхат Аймағамбетов еңбек қауіпсіздігін күшейтуге және жұмысшылардың құқықтарын қорғауға бағытталған заң жобасын таныстырды, деп хабарлайды Orda.kz.

Оның айтуынша, қазіргі еңбек заңнамасында шешімін таппай тұрған олқылықтар бар, соның салдарынан қызметкерлер негізгі әлеуметтік кепілдіктерден қағылуы мүмкін.

Аймағамбетов бұл мәселелерді жою үшін заңнамаға жаңарту енгізу қажет екенін атап өтті.

«Көп жағдайда жұмыс берушілер шығынды азайтып, әлеуметтік міндеттемелерден қашу үшін еңбек шартының орнына азаматтық-құқықтық келісімшарт жасайды. Адам жұмыс кестесіне бағынып, басшысының тапсырмасын орындайды, бірақ құжат жүзінде ол қызметкер болып саналмайды. Біз енді мұндай жағдайға нақты тосқауыл қоямыз. Еңбек қатынастарына қайшы бір белгі байқалатын болса, азаматтық-құқықтық келісімшарт жасасуға тыйым салынады», – деп мәлемдеді Асхат Аймағамбетов. 

Депутат сондай-ақ бірдей жұмысты атқаратын қызметкерлердің жалақысындағы айырмашылық мәселесіне тоқталды. Оның айтуынша, кейбір компаниялар шетелдік мамандарға қазақ­стандық әріптестеріне қарағанда лауазымы бірдей болса да әлдеқайда жоғары жалақы төлейді.