Цифрлық даму және аэроғарыш өнеркәсібі министрлігіне жаңа басшы келді

Цифрлық даму және аэроғарыш өнеркәсібі министрлігінің жаңа басшысы Жасұлан Мәдиев ант берді.

Үкімет отырысында Жасұлан Мәдиев ант берді.

«Қазақстан Республикасының халқы мен Президентінің алдында бар күш-жігерім мен білімімді Отанымның гүлденуі жолына жұмсауға, мемлекеттің Конституциясы мен заңдарын бұлжытпай сақтауға, Қазақстан халқына адал қызмет етуге салтанатты түрде ант етемін»,-  деді Жасұлан Мәдиев.

30 сәуірде Қасым-Жомарт Тоқаев Бағдат Мусинді цифрлық даму, инновациялар және аэроғарыш өнеркәсібі министрі қызметінен босатты.

Цифрлық даму министрлігінің басшысы Бағдат Мусиннің отставкаға кетуі қоғамда қызу пікірталас тудырып, көптеген болжамдар туғызды. Барлығы оның лауазымын неліктен тастап кеткені туралы сұрақ қоюда және ең көп таралған нұсқалардың бірі деректердің сыртқа тарап кетуі мүмкін деген болжам болды.