«Біз кез келген сценарийге дайынбыз» — Иран билігі Трамптың мәлімдемелеріне қалай жауап берді?

Тегеран келіссөздерге де, соғысқа да дайын. Бұл туралы Иранның сыртқы істер министрі Аббас Аракчи АҚШ президентінің Иранның өзі Вашингтонға ядролық бағдарлама бойынша диалог ұсынды деген сөзіне жауап ретінде мәлімдеді, деп хабарлайды Orda.kz. 

Министрдің айтуынша, жаппай наразылықтар жайлаған елдегі жағдай «бақылауда» екен. Сонымен қатар, Аракчи тәртіпсіздіктерге АҚШ пен Израильдің қатысы бар деп айыптап, Тегеранның қолында «бұған қатысты құжат түріндегі дәлелдер бар» екенін айтты.

Ал шетелде жұмыс істейтін ирандық құқық қорғаушылар бірнеше  жүздеген адамның қаза тапқанын хабарлауда. BBC Iran Human Rights ұйымының деректерін келтіріп, қақтығыстар салдарынан кемінде 648 адам көз жұмғанын жазды. Ұйым марқұмдардың нақты саны бірнеше мыңға жетуі мүмкін екенін де жоққа шығармайды.

Алайда бұл мәліметтерді тексеру қиын. Өйткені ел бірнеше күннен бері интернетсіз отыр.

Бұған дейін Трамп Иранға қарсы күш қолданудың түрлі нұсқалары, соның ішінде әскери нысандарға ауқымды соққылар жасау мүмкіндігі туралы айтқан еді. Бұған жауап ретінде Тегеран Израильге және АҚШ-тың әскери базаларына соққы береміз деп қоқан-лоқы жасаған. 

Айта кетейік, Түркістан облысында әйел мен екі баласы газдан уланып қайтыс болды.