Биліктегі шу: депутат Бақытжан Базарбек шенеуніктерге қарсы шықты

Депутат Бақытжан Базарбек шенеуніктердің шешіміне қарсылық танытты, деп хабарлайды Orda.kz.

Бұл туралы депутат өзінің Facebook парақшасына жариялады. Ол үкімет жер қойнауын пайдалану кодексі қабылданғанға дейін бекітілген келісімдер бойынша кейбір компанияларға өзендер мен көлдердің арналарындағы пайдалы қазбаларды өндіруге рұқсат берілгелі тұрғанын айтып, өзінің осы туралы пікірін жазды.

«Менің Мәжіліс депутаты, жер және экологиялық құқық маманы ретінде уәжім  – су нысандары өзендер мен көлдердің су қорғау белдеулерінде, су арналарында пайдалы қазбаларды өндіруге болмайды» деп жазды депутат. 

Ол су объектісін ауыр металдармен ластануы өзен мен көлдердің биологиялық және басқа да тұстарына зиян келетінін және нысан маңайында тұратын тұрғындардың сол суды тұтынып, денсаулықтарына залал келтіріп, қолдан ауру туғызып алатынын жазды.

Үкіметтің, су ресурстар министрлігінің, өнеркәсіп министрлігінің, экология министрлігінің, әділет министрлігінің уәжі бойынша, бұл келісім-шарттар ірі компаниялармен бекітіліп қойған. Ол компанияларда жүздеген адам қызмет етеді және олар келісімді бұзған сәтте компания жұмыскерлері жұмыссыз қалады және мемлекетке салық төленбей, экономикалық залал келтіріледі.

«Кімдікі дұрыс халқым? Мен заңдылық үшін ары қарай күресемін, бірақ халқым не дер екен!?», – деп сұрады Базарбек.