Бибігүл Төлегенова 95 жас мерейтойын атап өтті

«Астана Опера» театрында Қазақстанның әйгілі опера әншісі, Мемлекеттік сыйлықтың лауреаты Бибігүл Төлегенованың 95 жылдық мерейтойына арналған концерт өтті, деп хабарлайды Orda.kz.

Концертке Шахимардан Әбілов, Айгүл Үлкенбаева, Альфия Каримова, Зарина Алтынбаева, Толқын Забирова, Самал Байсеитова, Айзада Омарова, Нұрғалым Аманбай сияқты танымал өнер қайраткерлері қатысты.

Концерт «Абай» операсының «Тойбастар» сахнасымен ашылды. Онда лауреаттар Расул Жармағамбетов пен Татьяна Вицинская, хор, оркестр және «Астана Опера» балет труппасы Руслан Баймурзиннің дирижерлігімен мерекелік көңіл-күй сыйлады.

Фариза Оңғарсынованың «Бибігүл – ән» өлеңін Қазақстанның еңбек сіңірген қайраткері Нұрлан Өнербаев оқып берді.

Кеште әншінің шығармашылығының «символына» айналған Латиф Хамидидің «Бұлбұл» әнін оның шәкірті, Қазақстанның еңбек сіңірген қайраткері Толқын Забирова орындады.

Кешті ҚР Мәдениет және ақпарат министрлігі ұйымдастырды.

Бибігүл Төлегенова — қайталанбас орындаушылық өнерімен қазақ әнінде ойып тұрып орын алған тұлға. Әншінің алуан тақырыпты репертуарында қазақтың халық әндері «Гауһар тас»,  «Жиырма бес», Қазақстан композиторларының шығармалары, Хамидидің «Бұлбұлы», Брусиловскийдің «Қос қарлығашы», Төлебаевтың «Еске алуы», Рахмадиевтің «Тарантелласы», Мұхамеджановтың «Көктем вальсі», Тілендиевтің «Кел еркем, Алатауыма», сондай-ақ П.П.Чайковский мен С.В.Рахманиновтың романстары, Н.А.Римский-Корсаковтың операларынан ариялар және Батыc Еуропа сазгерлерінің, Доницетти, Григ, Шуберттің шығармалары да бар. Б.Төлегенова өзінің концерттік-орындаушылық өнерін шеберліктің жоғары сатысына көтеріп, классикалық дәрежеге жеткізді. Бұл тұрғыда ол «қазақ бұлбұлы» атанған. Бибігүл Төлегенова опера өнеріне де елеулі үлес қосып, Жібек болып (Брусиловскийдің «Қыз Жібегінде»), Гүлбаршын болып (Рахмадиевтің «Алпамысында»), Еңлік болып (Жұбановтың «Еңлік—Кебегінде»), Джильда, Виолетта болып (Вердидің «Риголеттосы» мен «Травиатасында») т. б. партияларды орындады.