Бектенов өңірді дамыту бойынша артта қалған Абай облысының әкімі Берік Уәлиге талап қойды

2025 жылдың тоғыз айының қорытындысы бойынша Қазақстанның ЖІӨ өсімі 6,3 % болды. 11 өңірде оң динамика байқалса, Абай, Ұлытау және Атырау облыстары артта қалып отыр, деп хабарлайды Orda.kz.

Осы жайында үкімет басшысы Олжас Бектенов сөз қозғап, талап қойды.

«Артта қалып отырған өңір басшылары жағдайды өзгерту үшін барынша күш салуы қажет»,— деді премьер-министр министрлер кабинеті отырысында. 

Бектенов әкімдерге экономикалық өсімге жету үшін базалық салаларды — өнеркәсіп, құрылыс, сауда және көлік салаларын дамыту қажет екенін еске салды.

«Негізгі назар өңдеу өндірістерін терең дамытуға және ішкі де, сыртқы нарықта сұранысқа ие өнім шығаруға бағытталуы тиіс». 

Жыл соңына дейін халық наразалығын тудырған коммуналдық қызмет тарифтерін өзгерту болмайды.

«Жауапты мемлекеттік органдар мен әкімдіктерге бағаны тұрақтандыру және инфрақұрылымның тұрақты жұмыс істеуін қамтамасыз ету бойынша қосымша шара қабылдауды тапсырамын»,— деді премьер-министр. 

Инвестиция тарту мәселесіне Бектенов ерекше назар аударды. Тоғыз айдың қорытындысы бойынша жоспар 93,3 %-ға орындалды, алайда тоғыз өңір мақсатты көрсеткіштерге жете алмаған.

Бектенов атап өткендей, инфрақұрылымдық жобаларды іске асыруды жеделдету, транзиттік тасымалды арттыру, сондай-ақ ауыл шаруашылығы мен ішкі сауданың әлеуетін белсендірек пайдалану қажет.

Наурыз айының ортасында «Мемлекетке жалған есеп бергізбеймін» деген  Берік Уәли екі шенеунікті қызметінен босатып, бірнешеуіне сөгіс берген болатын. 

Сонымен қатар биылғы Абайдың мерейтойында өздерін еріктілерге қоршатып жүрген Мәулен Әшімбаев пен Берік Уәли сынға қалған еді.