Батыс Қазақстанда өзеннен 300-ден астам өлі киіктің денесі шығарылды

Батыс Қазақстан облысының Қазталов ауданында Сарыөзен өзенінен өлі киіктердің денелерін тазарту жұмыстары жүргізілді, деп хабарлайды Orda.kz.       

Орман шаруашылығы және жануарлар дүниесі жөніндегі аумақтық инспекциясының басшысы Нұрлан Рақымжановтың айтуынша, өзенде өлі киіктердің жүзіп жүргені туралы хабар алған соң, оқиға орнына «Бөкейорда» табиғи қорығының қызметкерлері барған. 

«Қараоба ауылдық округі әкімдігі мен аудандық төтенше жағдайлар бөлімінің қызметкерлерімен бірлесіп, өзеннен 308 өлі киіктің денесі шығарылды. Олардың барлығы – биыл туған төлдер. Олар тереңдігі 40–50 см болатын сайдан шыға алмай қалған. Кейін олардың денелері арнайы мал көметін орынға апарылып, өртеп жойылды. Барлығы белгіленген алгоритмге сәйкес жүзеге асырылды, тиісті акт жасалды» деді  Рақымжанов. 

Инспекция басшысы сондай-ақ қоғам тарапынан «мұндай жерлерде неге кезекшілік ұйымдастырылмайды?» деген сұрақ туындап жатқанын айтты. Оның сөзінше, киіктер өзенді тек бір ғана жерден емес, бүкіл бойымен өтеді, сондықтан жағалаудың барлығына кезекші қою мүмкін емес. Бұған қоса, 10–15 күннен кейін төлдер өсіп, өзеннен өздері өте алатын болады.

Бұған дейін Батыс Қазақстанда өзенге батып өлген 560-тан астам киік өлексесі жойылғаны хабарланған еді.

Orda.kz тілшісінің «Ақбөкендер аштан қырыла ма? Ресейге өтіп кеткен жануарлар орала ма?» деген сұрағына жауап іздеген мақаласындағы ғалым пікірін  мына жерден оқыңыз.