Бас прокуратура Бишімбаевтың сотына БАҚ өкілдері неге кіргізілмегенін түсіндірді

Бас прокурордың орынбасары Әсет Шындәлиев бұрынғы экономика министрі Қуандық Бишімбаевтың атышулы сотына қатысты пікір білдірді. Журналистер одан сот залына БАҚ өкілдерін неліктен кіргізілмегенін және оның қаншалықты заңды екенін сұрады.

 Әсет Шындәлиев сот процесс кезінде тәртіпті қамтамасыз етуі керек екенін айтты.

"Сот ешкімді қорғамайды. Тек Бишімбаев емес, барлық сотталушы қарауыл жасағымен жүреді. Сот тәртіпті қамтамасыз етуі керек, түсінесіз бе? Бұл ток-шоу емес қой, бұл – сот. Онда тәртіп болуы керек", - деді Әсет Шындәлиев.

Сонымен қатар, БАҚ өкілдері оларға отырыс залында түсірілімге рұқсат етпегеніне наразы болды.

"Сот өкілі бұл жағдайды түсіндірді. Жариялылық қамтамасыз етілген. "Журналистер үшін барлық жағдай жасалған", - деді бас прокурордың орынбасары.

Қуандық Бишімбаев азаматтық некедегі әйелі Салтанат Нүкенованы аса қатігездікпен өлтірді деп айыпталып жатыр. Алдын ала тыңдау 11-12 наурыз күндері өтті. Соттың негізгі отырысы 27 наурызға белгіленді.