«Бәрін қаматамын!»: Ақтауда қайтыс болған сарбаздың әкесіне айыптының жауабын көрсетпей жатыр

Ақтау гарнизонының 25744 әскери бөлімінде мерзімді әскери қызметін өтеп жатқан жалғыз ұлына офицердің оқ атқанын айтқан әке айыптының мән-жайды баяндаған қағазын бермеді деп наразы, деп хабарлады Orda.kz.

Тергеу комитетіне келген әке күдікті офицердің кінәсін мойындағанына қарамастан, оның жауабын алуға мүмкіндік берілмей жатқанын айтады.

«Мен тергеу комитетінде тұрмын, маған күдіктінің жауабын бермей жатыр. Ол қылмысын мойындады. Бірақ, неге екенін  білмеймін, мені тергеу құпиясымен таныстырғылары келмеді. Мен бұл құжатты еш жерге жарияламаймын, тек заңды түрде адвокатқа жүгінгім келеді. Қазіргі таңда маған адвокат та, басқа ешкім де берілген жоқ», — деп мәлімдеді сарбаздың әкесі.

Қайғыдан қан жұтқан әке заң бойынша үш күн ішінде бұл құжаттарды алу құқығына ие екенін атап өтті. Алайда тергеушілер қажетті ақпаратты беруден бас тартып отырғанын айтты.

«Маған ешнәрсе бермей жатыр. Енді ұлымды алып кету үшін мәйітханаға бара жатырмын. Ол жерде вице-министр бар екен. Енді Астанаға дейін барамын. Бәрін қаматамын», — деді ол ыза болып.

Еске сала кетсек,  қайғылы оқиға 7 қыркүйек күні Ақтауда «Оймаш» полигонында болған еді. Офицер қаруды «дұрыс қолданбай» сарбазға оқ атқан делінеді. 19 жастағы сарбаздың әкесі бұл оқиғаның кездейсоқ жағдай екеніне сенбей, тергеудің толық жүргізілуін талап етіп отыр.