Балқашта сегіз жастағы баланы азаптау ісі бойынша сот басталды

Сотталушы тарап сот процесін жабық форматта өткізуді талап етті. Айыпталушылар орнында баланың әкесі жағынан туысы отыр, деп хабарлайды Orda.kz.

Еске сала кетейік, өткен жылдың тамыз айында 33 жастағы ер адам үйде өзінің екі кәмелетке толмаған баласымен және жиенімен жалғыз қалған. Ер адамның айтуынша, жиені оның төрт жасар қызына жыныстық сипаттағы әрекет жасаған. Ашуға булыққан ер адам жиенін аяусыз ұрып-соққан. Соққыдан жәбірленушінің саусақтары сынған, миы шайқалған, бірінші дәрежелі күйік алған, денесінің барлық жері көгеріп, қанталаған.

Баланың анасы Алматы қаласының тұрғыны. Ол ұлын атасының өтінішімен Балқаш қаласына бір жарым айға жібергенін айтты. Баланың әкесі, яғни оның бұрынғы күйеуі  қазір түрмеде жазасын өтеп жатыр екен. Оқиға болған күні атасы жұмыста болған.

Мамандар мен сараптама сегіз жастағы бала үшін жыныстық зорлық-зомбылық физиологиялық тұрғыдан мүмкін емес екенін растады. Баланың анасының айтуынша, бала ауыр психологиялық жарақат алған.

Әйелдің айтуынша, 2 тамызда ер адамның арызынан кейін полиция бірнеше сағат бойы баланы психологсыз жауапқа тартқан. Бұл бала үшін қосымша психологиялық соққы болған. Алдымен тергеушілер қылмыстық кодекстің 120-бабы бойынша іс қозғаған, бірақ кейін бұл іс тоқтатылды. 

Сот процесіне журналистер келген сәтте айыпталушы, оның адвокаты және іс бойынша прокурор сотты жабық режимге көшіруді талап етті.

Оның себебін «Интимдік сипаттағы мәліметтердің жарияланбауы үшін» деп түсіндірді олар.

Судья бұл өтінішті қанағаттандырып, журналистерді залдан шығаруды тапсырды. Айыпталған жақ  пікір беруден бас тартты. Ер адам кәмелетке толмаған балаға қасақана орташа ауырлықтағы дене жарақатын келтіргені үшін 6 тамыздан бері қамауда отыр.

Баланың анасы ұзақ уақыт дәрігерлерге бара бергендіктен жұмысынан айырылғанын, әрі қарай психологиялық көмекке ақы төлеуге шамасы болмай, несие алуға мәжбүр екенін айтты.

Айта кетейік, Жамбыл облысы әкімдігінің қызметкері «кезексіз баспана рәсімдеймін» деген уәдесі үшін сотталды.