Бағанашылдағы шудан кейін Алматы облысының білім басқармасына жаңа басшы келді

Алматы облысының білім басқармасына жаңа басшы тағайындалды, деп хабарлайды Orda.kz. 

21 тамыздан бастап Алматы облысы әкімінің өкімімен Төлеубекова Арайлым Ақсубайқызы Алматы облысы білім басқармасының басшысы лауазымына тағайындалды. 

Ол 2 ай бұрын ғана Алматы облысы білім басқармасының Іле ауданы бойынша білім бөлімінің басшысы болып тағайындалған. 

Арайлым Ақсубайқызы 1977 жылы туған. Ол 2004 жылы Абай атындағы Қазақ ұлттық педагогикалық университетін «басқа ұлт мектептеріндегі қазақ тілі мен әдебиеті» мамандығы, 2015 жылы Алматы Университетін «құқықтану» мамандығы, 2020 жылы Аймақтық әлеуметтік-инновациялық университетін «орыс тілі мен әдебиеті» мамандығы бойынша бітірген. Ал 2017 жылы Аймақтық  әлеуметтік-инновациялық университетінде «құқықтану» мамандығы бойынша магистр дәрежесін алған.

Еңбек жолын 2001 жылы Іле ауданы Рахат ауылының №20 орта мектебінің қазақ тілі мен әдебиеті пәнінің мұғалімі болып  бастаған.

Айта кетейік, 21 шілде күні Алматы облысындағы Бағанашыл ықшам ауданында орналасқан №1 балалар үйінің түлектері, демеушілері мен қазіргі тәрбиеленушілері мекеме қақпасының алдына жиналып, Қонаевқа көшу жайлы шешімге қарсылық танытқан еді. Мемлекет басшысының бастамасымен балалар көшірілмейтін болды.