Авторлық құқыққа қатысты өзгерістер мен толықтырулар

Мәдениет және ақпарат министрлігі авторлық құқық саласындағы жоспарлы өзгерістер туралы мәлімдеді, деп хабарлайды Orda.kz.       

«Қазіргі уақытта Министрлік Мемлекет басшысының 2023 жылғы 1 қыркүйектегі «Әділетті Қазақстанның экономикалық бағыты» атты Қазақстан халқына Жолдауын іске асыру жөніндегі Ұлттық іс-шаралар жоспарының 55-тармағын орындау мақсатында «Қазақстан Республикасының кейбір заңнамалық актілеріне зияткерлік меншік мәселелері бойынша өзгерістер мен толықтырулар енгізу туралы» Заң жобасын қарастыруда» деп хабарлады министрлік.

Авторлық құқық бөлігінде Заң жобасында сәндік-қолданбалы өнер туындысы сияқты авторлық құқық нысаны түрін нақтылауға, «қайталап көрсету» ұғымын енгізуге және авторлар мен басқа да құқық иелерінің мүліктік құқықтарын нақтылауға бағытталған түзетулер қарастырылған.

Сонымен қатар, зағип және нашар көретін адамдардың жарияланған туындыларға қолжетімділігін қамтамасыз ету үшін туындыларды тегін пайдалану жағдайлары қосылды.

Осылайша, автордың немесе басқа авторлық құқық иеленушінің келісімінсіз және авторлық сыйақы төлемей, бірақ автордың аты-жөнін міндетті түрде көрсете отырып, заңды түрде жарияланған туындыларды таратуға, көпшілікке жеткізуге, жария етуге рұқсат беретін түзету қарастырылған.